PARIGAL DUNIA CAMUH
Kamana jua dahi dipantukakan
lamun kada ka buncu pasahapan
imbah maliat parigal nusia wayahini
pina sasain camuh dunia diudakinya
Asing-asingnya haja kita sabarataan
maingkuti pisit tunggul iman nang batajak
dalam hati nang tatarusan maingatakan Tuhan
jangan pacang dilapas pingkutan kanu ampun-Nya
dikarik daki dunia matan awak nang hibak dusa
digisak tagar hati nang sasain manyabak
Parigal dunia saraba camuh
batariap bala manukui banua kita
matan banjir taun sumalam manukui hulu sungai
hudahnya kamandahan ngiyuk-ngiyukan pamadam
marga paulah nusia nang kada kataguran wahini
makanya jangan handak baparigal nang malalain
nini datu bahari hudah bapitua kanu kita barataan
jaga diri jangan handak bapaulah nang dikatujui sitan
jaga napsu sakira kada lanjar kaliuran ka hulu ka hilir
marga dunia camuh, babisa-bisa gasan nang dudi
Balangan, 2022
BACARI MINYAK LALA
Kabangatan wayahini
kangalihan mancari minyak lala
matan warung sampai ka tuku ganal
bilang karik kadada bahayut lagi
minyak lala nang batakar
atawa nang babungkus panyu
tatap kada taulihi
Sanunuh ada minyak lala
haraganya pina malatui banar
mandua kali lipat pada haraga nang masih
asa kada tatukar pulang han buhan jaba
Pacang bajarang wara iwak
pacang makan paisan hari-hari
pacang kada baminyak lalaan lagi
tapaksa minyak lanjar bakas sasangaan
dibulang buliki dipakai gasan basasanga
biar haja bakas manyanga pakasam
lawan jaruk mandai tiwadak
asal minyak lala kawa diimit
Ngalu jua sakalinya wayahini
haraga pancarikinan saraba malatui
dimapa buhan jaba pina saraba santuk
pancarian sakit alian padaringan puang
bahara haja minyak lala baturun
nyaman makan baiwak basanga
nyaman hati kada marma
Balangan, 2022
BULIK JUA DANGSANAK SAKALINYA
Mangganang Dangsanak Abdussukur Mh
Badiaha kada sing bangsulan
ada nang diarit sakalinya
nang rajin haur balulucu
nang masih pina bacangul
balalu hinip kada burinik
Liwar kaganangan banar kami
lawan parigal nang maulah tatawa
nang kada suah takalir balang rista
tatarusan hampai ka buncu umur
mambangkit batang kasanian tradisi
jadi Pamandungan disaru urang
jadi Pamandaan dihakuni jua
kada pamilih asal gasan banua
liwar banar dangsanak naya
Siapa pulang jadi Khadam
siapa jua jadi Pamandungan
nang rahat bakisah di karasmin
nang rancak maulah lucut tatawaan
mudahan imbah dangsanak bulik naya
ada pulang panarusnya anak cucu banua
Bulik jua dangsanak lih sakalinya
pina kada bahabar handak bulik
timbul habut kakawanan barataan
mandangar habar bulik balakas
pina bahancap diambili-Nya
Lakun naya garisan takdir hudah
kada kawa dikarik hudah ditantuakan
mancugut ngaran di batur hudah batulis
kaya naya pancung hidup hudah habis
himung maliat dangsanak hudah nyaman
janak di bawah rapun kambang kambuja
mudahan haja masuk surga Allah Ta’ala
Balangan, 2022
