MANJANAKI BALAHINDANG
wayah balahindang maurak balang
matan mata pian nang habang
bibir basulam himung
kaning mancuring
manjanaki balahindang
matan mata pian bulaling
bakaluk turun ka kurihing
naitu nang ulun tiring
2021
PAPADAH DI BUNCU JUKUNG
di buncu jukung
linggang linggukan di atas banyu
bakayuh matan tabing ka muhara
kutingau kanan ilung baliyukan
kutiring kiwa kayapu baampikan
di buncu jukung
gambutku nang sain surut
padang purunku nang takikih
diulun rawai bacaramin di banyu
kayadimapa jua alahai nasip dihadap
lamun anak cucu kada tahu di jangang
kaluku cicit buyut kada tahu di paikat
di buncu jukung
galitiran nining manimba banyu
manggatar kai maingkuti kakayuh
jukung tambangan si jukung dukuh
balinggang di banyu mata banuaku
2021
BANYU MATA BULANAK
kayaannya taganang kisah sumalam
cakada takikih matan paingatan
bala nang mandaruduh saunjutan
hampai ka pancung ati takikihan
cakada basisa sabiji banyu mata
ayungannya batandak maristaan
tamandak gawian sabarataan
tacagal tunggur kaidupan
babau hancing kadinguran
babau lunak batandakan
babau linak saalamanan
banyu banjir basurutan
banyu mata balimpasan
batinggalan bulanakan
2021