HUDAH tangah dua tahunan Alan wan Hasnah hidup barumah tangga. Anak hudah dapat saikung, bibinian, dingarani Ratnawati. ‘Ratna’ artinya intan parimata, ada ‘wati’ bisa diartiakan ‘anak bibinian’. Jadi, anak nang dingarani Ratnawati diharapakan kuitannya kawa jadi liliatan mata nang bungas kaya intan parimata jua mun inya hudah ganal kaina. Kada sahibar bungas di awak rupanya haja, tagal bungas jua di kalakuan wan pamandirannya.
Limbah baranakan saikung nangitu rajaki Alan pina sasain balancar haja. Wadah kaganaan di Kuin Carucuk nang asalnya manyiwa bidakan haja wayahini hudah kawa batajak rumah saurang di Palambuan. Talu bulan samalam inya sawat ditulakakan ka Jakarta, disuruh Dewan Komisaris parusahaannya maumpati diklat husus manajemen keuangan.
Halat bangsa sabulan limbah tuntung diklat nangitu Alan diangkat jadi Manajer Keuangan. Lantaran jabatan hanyar nangitu jua, wayahini inya dijulungi mutur dinas gasan baurusan ka kantur pajak atawa urusan nang lain, tamasukai jua gasan bulang-bulik matan di rumah ka kantur.
Mahati Alan, kikira bujur jua ujar urang tuha bahari mun bini wan anak tu dasar jadi lawang rajaki lalakian. Nang musti, salawas inya baisian anak-bini nangini, inya saurang nang marasaakan.
“Ka Alan,” jar Hasnah malam nangitu, limbah tuntung sumbahyang magrib, limbah tahu mun lakinya hudah naik jabatan. “Limbah pian diangkat jadi Manajer Keuangan ni baarti gajih wan tunjangan pian musti naik jua kalu?”
“Hi-ih, nyataai hudah,” jar Alan mambujurakan.
“Kikira barapa lah, Ka, gajih pian kaina sabulan?”
“Mun samunyaan ada pang saku mun lima jutaan.”
“Uuhhh…, banyak jua sakalinya, Ka’lah.”
“Kanapa garang, Ding, maka ikam batakun kaya itu?”
“Kadapapaai, Ka’ai. Tagal, ujar ti kabiasaan lalakian Banjar tu lamunnya hidup hudah pina tanyaman saikit balalu haja bapikir handak bacari nang anum pulang. Handak maubah rasa, jar. Bujur nang kaya itukah, Ka Alan?”
Mandangar tatakunan bininya nang kaya itu mangatingkang Alan tatawa.
“Macam-macam haja ikam ni, Dingai. Nangitu tu urang, lain pada laki ikam nangini. Mun aku ni babini ikam saikung haja gin cakada bakahabisanan lagi. Maka handak mandua-talu lah.”
“Nah, pian ni jangan tatawa dahulu, Ka’ai. Kada lucu. Marganya ada jua urang nang baparibasa. Nangini pinanya paribasa husus gasan lalakian Banjar. Pian gin kikira hudah suwahai jua mandangar.”
“Hau, paribasa nang kaya apa pulang?”
“Ujar urang ti nang kaya ini, Ka’ai. Babini saikung hanyar balajar, babini dua paguni wajar, babini talu kurangajar, babini ampat hanyar urang Banjar. Nah, hudah suwah jua kalu pian mandangar?”
Sakali pulang Alan tatawa mangatingkang. Hampai bapicik-picik parut. Hampai tapancar-pancar banyu matanya.
“Alaahhh…, umanya Nana ni talalu pamarcayaan. Nangitu ti gasan urang bahuhulutan banarai. Kadainya bubujuran pang. Lamunnya bujur musti ha hudah liwar banyaknya lalakian Banjar nang babini ampat. Cuba ha ikam janaki, cuba ikam rikin-rikin saurang, barapa ikung garang ada urang Banjar nang hudah babini hampai maampat-ampat?”
“Tagal, ujar ti nangitu sunah Rasul, Ka’ai.”
“Nah, iyaam hudah. Tagal, mun pangrasaku haja pang, Ding lah. Lamunnya nangitu tu bujur jua sunah Rasul, biaram khususan gasan Rasulullah haja. Mun aku ni kada sarana maumpati gin kalu.”
Hasnah lihum pina kahimungan.
“Nang kaya ini,” jar Alan pulang. “Inya bujur haja pang di dalam al-Qur’an tu ada ayat nang mambulihakan lalakian babini dua, talu, hampai ampat. Tagal, kadada jua mun manyuruh sampaya lalakian babini hampai maampat-ampat. Kada disuruh kada. Nang disuruh tu malahan babini saikung haja. Kada dua-talu-ampat kada. Ujar Tuhan, nang babini saikung tuti nang taparak lawan kada baparigal sakahandak hati. Aniaya, astilahnya.
