KINTAP, 2010. Alan kada suwah mambayangakan, umpat bagawi di panambangan batubara nangini sakalinya kada nyanyamanan. Napalagi limbah inya tahu mun panambangan ampun Haji Ahim nang diumpatinya ni sakalinya lain parusahaan ganal nang baisian ijin rasmi matan pamarintah. Astilahnya, panambangan batubara nang digawi Dardi wan Haji Ahim nangini tamasuk illegal mining.
Limbah tahu nang sabujurnya balalu Alan asa saraba salah. Handak baampih katia kada nyaman lawan Dardi, handak batarus katia inya hudah tahu manggawi gawian nang musti salah. Hudah nangitu, ada jua parkara lain nang asa kada manyamanakan hati Alan. Bilang handak saban minggu ada haja tadangar urang bakalahian batimpasan atawa basudukan di panambangan nangitu.
Habar nang hampai ka talinganya, saban butingan panambangan liar nangitu asing-asingnya bainguan pariman nang didatangakan matan Rantau, Kandangan, atawa Barabai. Bubuhan urang nang kada mamak dijarang. Bubuhan urang nang katuju bakalihi pada saruan ka urang basalamatan.
Ujar kakawalannya suwah bakisah, bubuhannya nangitu lamun sakali tulak manyarang urang musti basangu gagaman bilang bakarung-karung.
Baluman lagi nang batajak di pinggang atawa nang bajarat di batis subalah-manyubalah. Karis, mandau, lading balati, pisau sadap, parang bungkul, parang harit, samunyaan dibawa tulak. Samunyaan nang rarapan bulu.
Marga nangitu, saban kalian limbah tuntung sumbahyang, wayahini rancak Alan badu’a mumudahan inya kada lawas lagi umpat bagawi di wadah Haji Ahim nangitu. Mahatinya, maraha bagawian nang tasakit asal ampih bagawi di tambang batubara nangini. Rahat asa kanting parutnya mahatiakan kalu-kalu pina inya saurang nang tasumbaya disudat urang.
Tumadak nugaraha, limbah kikira ampat bulanan Alan sawat bagawi di panambangan batubara ilegal nangitu tadangar habar lamun Haji Ahim tatangkap badua Mat Hirang, kawal Dardi nang saikungnya. Kada lawas, minggu kainanya inya mandangar habar pulang lamun Dardi saurang hudah tajun maninggalakan Banjar limbah mandangar habar kakawalannya ditangkap pulisi.
Hajat hati Alan ampih bagawi di panambangan nangitu baarti hudah takabul. Tagal, sahuwaran pulang nang maulah inya asa kapulingaan. Rumah di Banjar hudah tasanda, anak-bini hudah dibawa, duit simpanan papadaannya, nangapa pulang nang cagar digawinya? Kaputingannya, nang kaya wayah inya hanyar di-PHK di PT Meranti Jaya dahulu jua, rancak pulang Alan taungut saurangan mamikirakan awak nang kada sing gawian lagi.
“Anu, Ka’ai,” jar nang bini malam nangitu limbah maliat Alan rancak ungut-ungut pulang kada mangaruan. “Samalam tu wayah ulun ka rumah subalah ada pang bini Tuhalus bakuyaan. Jarnya, mun pian hakun umpatan bubuhannya maujik kawaai jua. Tagal, jarnya ti, pian musti baisian sapida mutur saurang pang.”
“Maujik, Ding? Aduh, asa kadapati masuk di akal nah mun aku maujik di sia. Samana sapida mutur kita hudah tajual wayah handak bapindah samalam, urangnya di kampung sia pina kadapati rami jua. Pinanya kada payu pang mun aku umpatan maujik. Bubuhan Tuhalus tu maujik di mana garang, Ding?”
“Nah, pian ni katinggalan info, Ka’ai. Maksud bubuhannya tu lain pada maujik biasa pang. Kada maanjur urang kada. Bubuhan Tuhalus tu maujik kayu. Maanjurakan kayu ulin ampun urang ka Bati-Bati atawa ka Pamasiran di Liang Anggang. Mun handak habar nang bamusti, cubai ja pian datangi Tuhalus ka rumahnya.
Batakun pian bujur-bujur nang kaya apa gawiannya.
Lamun angkuhnya pina kawa haja, pian rasaakanai dahulu dua-talu bulan. Bilanya pian asa nyaman haja, handak bataruskah lagi pian tasarahai.”
“Hi-ih, Ding lah. Kada rugi aku babini ikam ni.”
“Han, pian ni, Ka’lah. Balalu ha pina siwah pandiran.”
“Ai, bujur nah. Ada haja ikam ni akal mun aku lagi pina mauk.”
