KAMBANG CULAN
baharum baisukan
ambun likat di daun tarap
kacut halui kadinguran arum
bahindangut banahap mancium
galuh langkar duduk di watun
takurihing bapainan basimban
kambang culan kambang banua
kacui bulat batangking bacurai
babalang kuning liwar bau arum
daun mancilang tahindau matari
tumbuh di pancung halaman rumah
kambang culan kambang Banjar
rahat dipipil dijamur hampai karing
diandak ditata di dalam lamari
maarumi pakaian urang bahari
manjunjung adat maulah gawi
manurunakan taradisi ka juriat
2021
RAKUNGAN BATANG BANYU NINI DATU TAKAPIT
cakada tajanaki lagi ginjir
nang racak baayun di galumbang
cakada tatingau jua kayapu
nang rahat tasirarak di kakaruhan
sanunuh nang larut raba katia raba
palastik lalu lalang babalang-balang
manabat rakungan batang banyu nini datu
banir-banir rumah lanting sain riutan
tihang-tihang rumah babanjar sain japukan
batang banyu di barumahannya basurut
tatinggal lucak bulanak lawan raba tapatak
ka mana jua banyu jaranih bahari
hudah sain rasap ka kulimbit pitak
kaputingannya jadi banyu mata nini datu
nang ba’ah jadi bala mahantam banua
jukung sudur taundur tamara
jurung tiung tahuyung-huyung
jukung tambangan tarampakan
tatinggal sasigan batang banyu
mangisak malangsar banyu mata
pitak nini datu baujar basumpah
lamun batang banyu hudah kisut
juriat buyut intah jangan takajut
lamun banua takarik tasusut
2021
BALIKUHAI
ngaran balikuhai
imbah diaduk dikulai
ditampa ka acuan wasi
batanggar di curuk api
himung urang banua baisi
ngarannya wadai balikuhai
bagula habang nyaman dirasai
kamir kanyul wadainya dijapai
balikuhai wadainya urang Barabai
2021
