*Kambang culan sasangkutan kakamban habang
taungut rindu manangis malihat kakamban
kakamban nang habang…
Badundang muntung mambuntil katik-katikan jariji tangan ka tali panting nang bakapala naga, rahatan angin manampur di palatar wayah Maulidi maarit ati ganangan lawan galuh Bayah nang bungas. Dasar babanaran langkar galuh Bayah anaknya Haji Dulah naya lamun rambutnya talimbah pada kakamban pantar maikal mayang lakun kambang kacang, kaningnya bararap mangumpang parang, bibir mancirarau mahabang sapah, balasung pipi halui, pakakas awak saraba mungkal mancarunung, ngaran urang hanyar naik bujang bubungasannya lakun humbut mamuga basilak. Maraga galuh Bayah bagana sakampung wan Maulidi hingkatnya bajajadian jua’ai buhannya imbah lawas batitiringan.
Bayah sakalinya galuh nang rancak mahayabang di panjanak Maulidi wayah diinya badundang Kakamban Habang, pangrasa kadada papantarannya pang bibinian di kampung dapatnya galuh Bayah, pantas haja Maulidi karindangan kada babuncu.
***
“Uhuk.. uhuk… Tuh.. uh.. Utuh…” matan tawing rumah tadangar suara Kai Abai, hancap Maulidi maandak ka panting, ditingaunya ka kamar, Kai Abai talukup manahani batuk manggah sambil bahiau kanu Maulidi. Kai Abai nang maingun Maulidi tumatan lacit, wayah dalam parut Umanya batianan ampat bulan, Abahnya maninggal imbahitu wayah Sakulah SMP Umanya pulang badahulu dikiau Allah Ta’ala, ngaran nasip Maulidi jadi anak yatim piatu digaduh Kai Abai, alian Kai Abai naya paranahnya mamarina kanu Maulidi lain pakaiyan bujur, ngaran sidin kada baisian anak hampai wayahini diingun sidin Maulidi tagal pangrasa kada urang jua Maulidi tumatan lacit hudah patuh lawan Kai Abai putingnya pangrasa pakaiyan atawa kuitannya saurang jua Kai Abai nginih. Satumbangan ditinggalakan kuitannya, Kai Abai maharagu Maulidi hampai wayahini bujang hudah tamat Sakulah.
“Pun… napang Kai, hadang ulun maambilakan banyu bamati ka padu dahulu nah. Maulidi balinjang ka padu maambibitakan banyu bamati.
“Nah Kai lakasi minum hulu ubatnya nah” Talu bigi ubat barian Mantri diuntal Kai Abai bapalungsur banyu bamati, riguk-riguk sambil manahani batukan sidin.
“Barabah bagagana pian Kai’ai, ulun ada haja baduduk di luar lamun pian nangapa-nangapa”. Dirabahakan Maulidi kapala Kai Abai ka bantal bagamatan alian sakitan awak Kai Abai amun tapantuk.
Maulidi imbahanu kada kawa manahani banyu matanya nang takalir dua talu bigi matan matanya malancar ka pipi, disapuinya ranaian. Kayadipana kada taingui tangis lamun manjanaki Kai Abai pantar kada hingkat nangapa-ngapa lagi barabahan haja di kamar, hudah hitungan sawalas bulan Kai Abai gagaringan, hudah dibawa basuntik ka Puskismas, Rumah Sakit, ka tukang tatamba hampai dipintaakan banyu ka bubuhan Urang Alim. Tatap haja cakada igul-igul kaputingannya Kai Abai barabahan haja gulang galik di kakampikan, awak manguringkai kurus jahing, tulang bahu sain bakubak kawa diharami hayam, pagalangan tangan lawan batis pantar sakacakan kakanak tinggal tutulang babungkus kulimbit. Tagal Maulidi tatap kancang ati lamunnya Kai Abai kaina kawa sigar wigas pulang.
Kai Abai jua nang malajari Maulidi bapantingan, diajari manarah batang nangka mamahat karungkung panting, manyatil talinya lawan maminandui ilun bunyinya, hampai harat lakun wayahini Maulidi mangatik panting. Bahari wayah Kai Abai masih wigas, Maulidi karap dibawa sidin lamun ada karasmin, umpat bamusik panting duduk di higa sidin Maulidi lagi lacit wayah sidin mangatik panting. Parigal Kai Abai naya saunjutan kampung urang tahuan sidin pamantingan atawa saniman panting matan kakanak, karap bagalumuk lawan buhan pamusikan panting di Hulu Sungai, lamun ada karasmin musti hudah Kai Abai tukang patik pantingnya mambuntili dundang-dundang Banjar.
Bahari jua kada lakun wayahini urang baisian Tipi, jadi asing-asingnya rami balinjang batis maitihi karasmin, lamun tadangar urang bakarasmin haja di pancung unjut mana haja didatangi lamun kada hingkat balinjang batis basapida tinjak tulakan. Jaman sain ka sia sain basasar sasain jua kada tantu lawan cacamuhannya jua kada karuan tampuh lagi, tuha anum asing-asingnya jajapaian mangguliming Hp. Sasain jua pakakas kasanian lawan dundang taradisi Banua sain lumusan maraga kadada juriat panarusnya lawan nang tuhanya maninggalan.
Hampai manurun kabisaan Kai Abai bapantingan naya kanu nang cucu Maulidi, wayahini Maulidi bagalumuk di jibun pawadahan musik panting. Sakali dikiau urang bakaarasmin mamanting mayu haja lima puluh hampai sararatus ribu Maulidi kulihan, nitu juaam mayu nukar baras lawan manahuri ubat gasan Kai Abai haja, ngaran karasmin kada tantu wayahnya sakali samustawa juaha, nang karap bakarasmin amun kada pangantinan atawa Hari Jadi Kuta, nitu gin amunam jua.
***
Rahatan ari papanasannya mambarangat, galuh Bayah mancungul mangatuk ka lawang rumah Kai Abai mancarii Maulidi. Kada saapa mambangsul jua Maulidi mambukai lawang. “Kanapang ti ding?” Maulidi pina tacagal maitihi galuh Bayah di hadapannya. Damhatinya asa kadada mamadahi handak ka rumah.
“Ulun ka sia, handak mamadahakan kanu pian” Ujar bayah Bayah pina tatunduk muhanya.
“Ai nangapa ti, duduk dahulu nah bapandir babujur” Maulidi mambawai dudukan di pancung palatar.
“Kanu Ka’ai ujar Abah, pian disuruhakan ka rumah kaina!” galuh Bayah balalu takurihing saikit, pina maharap Maulidi mamaham pandirannya. Mandangar ucapan galuh Bayah balalu malabuk ati Maulidi pangrasa dada ditumbuk ulin, lamun abahnya Bayah manyuruh ka rumah musti hudah kada lain lagi handak manyuruh balakas badatang. Maraganya urang di hulu lawan di hilir hudah pantar tahabar lamun inya lawan galuh Bayah naya bajajadian. Magunnya bubuhan kaluarganya galuh Bayah sasatakuni jua.
“Ujar Uma jua sidin manyambat haur ditakuni urang tarus rahat ka warung, parakkah hudah jar urang ka’ai, jadi taumpat supan jua lamun kada balakas.” galuh Bayah pina mandarihing pandir mamadahi kanu Maulidi, tagal Maulidi asa dikambit muntungnya ranai samiut pangrasa saraba santuk atinya, handak himung katia cakadada baisian napa-napa hagan manjujur, handak marista katia habar baik nang datang pacang disuruh badatang.
